Have a small circle of friends and don’t see or speak to any of them. Be a Man.
Ég hló.
Kannski vegna þess að það er eitthvað óþægilega kunnuglegt við þetta.
Við eigum stundum mjög auðvelt með að gera sjálfstæði að dyggð.
Ég redda þessu.
Ég finn út úr þessu.
Ég þarf ekki að trufla neinn.
Ég ætla aðeins að hugsa þetta betur.
Svo sitjum við ein með vandamál sem einhver annar leysti fyrir þremur árum.
Þú ert líklega ekki sá fyrsti
Það eru mjög fá vandamál sem við mætum sem enginn hefur séð áður.
Þú ert líklega ekki fyrsti maðurinn sem hefur:
ráðið rangan starfsmann,
verðlagt verkefni vitlaust,
lent í lausafjárvanda,
átt erfiðan viðskiptavin,
byggt vöru sem enginn vildi,
þurft að segja upp fólki,
misst stóran samning,
eða staðið frammi fyrir ákvörðun sem virðist ómöguleg.
Þúsundir annarra hafa glímt við eitthvað mjög svipað.
Og líklega hafa þúsundir þegar fundið leið í gegnum það.
Það þýðir ekki að þeirra lausn sé sjálfkrafa þín lausn.
En reynsla þeirra getur sparað þér mikinn tíma.
Tengslanet er ekki safn af nafnspjöldum
Ég held að við tölum stundum vitlaust um tengslanet.
Eins og markmiðið sé að þekkja sem flesta.
Mér finnst miklu mikilvægara að hafa fólk í kringum sig sem maður getur hringt í og sagt:
„Ég veit ekki hvað ég á að gera hér.“
Og vita að hinn aðilinn reynir ekki strax að selja manni eitthvað, sýna hversu klár hann er eða dæma mann fyrir að vita ekki svarið.
Hann segir kannski bara:
„Ég hef lent í þessu. Hér er það sem ég lærði.“
Það er ótrúlega verðmætt.
Ein góð spurning getur sparað marga mánuði
Ég hef sjálfur oft haft tilhneigingu til að reyna að leysa hlutina fyrst.
Læra meira.
Greina meira.
Finna betra kerfi.
En stundum væri stysta leiðin einfaldlega:
Hver þekkir þetta vandamál betur en ég?
Og síðan:
Af hverju hef ég ekki hringt í hann?
Stundum er svarið stoltið.
Stundum viljum við ekki trufla.
Stundum viljum við helst koma til fólks þegar við erum búin að leysa vandamálið.
Sem er dálítið fyndið þegar maður hugsar um það.
Tengsl virka í báðar áttir
Það er samt eitt sem skiptir máli.
Tengslanet er ekki bara hópur fólks sem þú hringir í þegar þú þarft eitthvað.
Þú þarft líka að svara símanum.
Deila reynslunni þinni.
Tengja fólk saman.
Segja frá mistökunum sem þú gerðir svo næsti maður þurfi kannski ekki að gera þau.
Þannig verður tengslanet verðmætt.
Ekki vegna þess hversu marga þú þekkir.
Heldur vegna þess hversu mikið flæði er á reynslu, trausti og hjálp á milli fólksins í því.
Svo kannski er spakmælið aðeins rangt
Hafðu lítinn hóp góðra vina.
Þú þarft ekki að tala við þá á hverjum degi.
En þegar þú ert búinn að sitja einn með sama vandamálið nógu lengi:
Hringdu í einhvern.
Það gæti verið skynsamlegra en að vera maður einn í hellinum.