Vilbert
Gústafsson.

Ég hef oftar en einu sinni þurft að endurmeta hvernig ég vil lifa og vinna. Ég reikna fastlega með að gera það aftur. Raunar stóla ég á það.

Ég hef byggt fyrirtæki, unnið með fólki og fyrirtækjum í vexti og erfiðum aðstæðum, upplifað bæði árangur og áföll og þurft oftar en einu sinni að byrja upp á nýtt.

Bakgrunnurinn minn er fjölbreyttur. Ég hef starfað á sjó, í mannvirkjagerð, rekstri, fjármálum, samningum, endurskipulagningu fyrirtækja og frumkvöðlastarfi.

Sumt hef ég lært í skóla. Annað hefur lífið kennt mér með aðeins beinni hætti.

Faðernið og það sem skiptir máli

Börnin mín hafa alltaf verið miðpunktur í lífi mínu og velferð þeirra skiptir mig öllu máli.

Faðernið hefur kennt mér meira um ábyrgð, kærleika, ótta, von og mannlegt eðli en nokkur kennslubók. Það hefur líka vakið hjá mér djúpan áhuga á tengslamyndun, gildum, mörkum og því hvernig reynsla okkar mótar okkur.

Að missa son minn er reynsla sem hefur mótað mig djúpt. Hún breytti ekki bara því hvernig ég hugsa um sorg og missi, heldur líka því hvernig ég hugsa um tíma, fjölskyldu, ábyrgð og það hvað það þýðir að lifa vel.

Kannski hefur það líka aukið þörf mína fyrir að skilja. Að spyrja meira, læra meira og vera minna viss um að ég hafi þegar svarið.

Ég veit það ekki!

Ég hef lengi sagt að ef ég skrifa einhvern tíma bók eigi hún líklega að heita „Ég veit það ekki!“

Með árunum hefur mér orðið æ ljósara að það er enginn veikleiki að vita ekki. Þvert á móti. „Ég veit það ekki“ opnar dyr að forvitni, námi og betri spurningum.

Ég hef oft farið af stað í verkefni án þess að vita nákvæmlega hvert svarið væri. Reynslan hefur kennt mér að leitin að sannleikanum byrjar sjaldnast á því að hafa rétta svarið.

Hún byrjar á því að þora að spyrja réttu spurninganna.

Kannski er það ein ástæða þess að ég hef aldrei hætt að læra.

Eilífur nemandi

Ég hef sótt mér menntun á ólíkum sviðum, frá vélstjórn og flutningafræði til viðskiptafræði og MBA náms.

Síðar hef ég haldið áfram að læra þar sem forvitnin hefur leitt mig. Ég lauk meðal annars námi hjá MIT Sloan Executive Education í gervigreind og viðskiptastefnu.

Áhugi minn á börnum, tengslamyndun og fjölskyldumynstrum leiddi mig einnig í nám hjá Child Attachment and Family Trauma Training.

Á síðustu árum hef ég jafnframt lagt mikla vinnu í eigin þroska, meðal annars með markvissri þjálfun innan Tony Robbins umhverfisins. Sú vinna hefur snúist minna um að bæta einhverju við ferilskrána og meira um að skoða eigin viðhorf, ákvarðanir, tengsl, peninga og hvernig ég vil í raun lifa lífinu.

Ég lít ekki á nám sem eitthvað sem maður klárar. Fyrir mér er það leið til þess að sjá heiminn frá nýju sjónarhorni.

Það sem ég skrifa um

Ég skrifa um það sem ég hef lært, það sem ég er að hugsa um og það sem ég er að skapa.

• Lífið, gildin og ákvarðanirnar sem móta okkur.
• Viðskipti, rekstur og verðmætasköpun.
• Peninga, eignamyndun og fjárhagslegt frelsi.
• Tækni, gervigreind og breytingarnar sem fylgja henni.
• Mannlega hegðun, tengsl og persónulegan þroska.
• Hugmyndir sem ég er að prófa, stundum áður en ég veit hvert þær leiða.

Af hverju ég skrifa

Ég skrifa ekki vegna þess að ég tel mig hafa fundið öll svörin.

Frekar hið gagnstæða.

Skrifin hjálpa mér að hugsa. Að taka reynslu, hugmynd eða spurningu og reyna að sjá hana aðeins skýrar.

Stundum snýst það um fyrirtæki. Stundum peninga eða tækni. Stundum um fjölskyldu, gildi, frelsi eða einfaldlega hvernig við viljum verja þeim tíma sem við höfum.

Þessi síða er því ekki um eina starfsgrein.

Hún er safn af því sem ég hef lært, því sem ég er að hugsa um og því sem ég er að skapa.

Kannski er rauði þráðurinn einfaldlega forvitni um hvernig hægt er að byggja betri hluti. Fyrirtæki, hugmyndir og líf.

Höldum samtalinu áfram

Þú getur náð í mig á vilbert@vilbert.is.